Chaymi, lliw kaypi paqariqkuna ancha, ancha kusisqa kachkanku, wakinnin tiyaqkunapas; chayqa allinmi kusikuywanmi qawarinku kay raymichakuyta chaycha pachamamapas kusisqallaña kachkan, urqukuna, mayukuna, uywakuna, sachakuna, hinallataq, tukuy wiñaq kay llaqtaypi; chayña kaptinqa wawankuna, warmakuna, waynakuna, lliw runakuna, amaya qanrachasunchu, putkayachisunchu yakuta, allpata, allin kawsaypi tiyananchikpaq.
Chaytaq allinta qawakunqa muyuynin watakunapi, manachayqa wayrapas, yakupas pisillaña kanqa llakipakuypaq, ñuqanchikpa makinchikpin kachkan, chay katinqa kunanmanta pachayá tantiyaykanakusqa chulla umalla, chulla sunqullapi llaqtanchiktaqa qaliyachisunchik, chayri sapakama tupawanchik churapakunanchikta kay ruwaypi.
Sichus, llaqtayki raymichakunman yaykuchkan amayá qawallaychu, ñuqanchikmantapas kanmanmi raymichay, kay ruwaykunawan: takiwan, willakuywan, qillqakunawan, taripaywan; chayna kaptinqa kusan kanman llaqtanchikrayku.
Ichaqa lliw umalliqkunapas minkarikunankun llaqtamasinchikkunata churapakunankupaq, kay raymichakuykunapi kusi kusillata qispichinanchikpaq; chaywanpas, amayá qunqananchikchu hatun taytamamanchikkunata, yuqaq kaspankupas, paykunaqa suyachkankun imallapipas yanapakuyman churapakuyta.
Chaypas chayllapichu qipanman, aswanyá riqsikuykunata kawsaqchanpi apasunchik, achka runan llaqtanrayku llamkan, taripan, tarpun, mikuchin, kuyapayan, mana pinqakuspa, runamasinchikrayku; chaypis allin ñawiwan akllananchik, tapunanchik llaqtan llaqtan, chaymanhinan riqsinanchik pikunan hanayman llaqtata apanku, lliw tiqsi muyupi qawanankupaq, hinallataq uyarinankupaq.
Chaynaqa Antawaylla runa kaspaykiqa, rimay, llamkay, churapakuy, qaway, tuqsiy, qatipay, amañayá qillachakuychu; hinaspa tukuy yachayninkunata chiqirichisunchik yachaykunata lliw yachaywasikunapi, tukuy ima kawsaykunapipas; nispaqa kusi kusillañan kanqa llaqtanchik hinallataq runamasinchikkunapas.
Chaymanta ama qillu kasunchikchu, ima qayakuymanpas anchuykunan, ama chaqwakunamanqa yaykusunchikchu, allin ruwaykunaman churapakusunchik, warmakunapas qatiwananchikpaq, allin runa paykunapas qispinankupaq; aswan yachachiqkunapas yachaywasimanta pachayá matipananku yachayninkunapi warmakuna hinallataq waynakuna llaqtanchikrayku kuyakuywan tukuy yachaykunata qillqanankupaq, rimanankupaq, llimpikunapi qawachinankupaq, tukuy rapi, maytukunapipas.
Ñawpaqtaqa lliw runakunan pinqakurqaku maypi paqarisqanta, sarurqaku, hinallataq qichwa rimaytapas, watakuna muyusqanmahinan kay tiqsi muyunchikpi chayllaraqmi kallpanchakuchkan mama simikuna, chaymi kusirichiwan ancha anchata.
Tukunapaqtaq, sapa ayllunchikpin yachachina warmakunata kuyayta ayllunchikta, llaqtanchikta, maypi paqarisqanchiktapas, maymanta kasqanchiktapas, allin runa qispinankupaq, qari, warmi kaptinkupas, chayqa allin yachaymi kanqa; hinaman sapa yachayninchikkunatayá qillqana kanqa, yachachina kawsaqchanpi llaqtanchik maypipas uyarikunanpaq, napayninta raymichasunchik; ichaqa qampin kachkan kaykuna mana chinkananpaq; chayman kallpanchasunchik ayllunchik kusi kusilla kananpaq, chankasmi kanchik, allin runakunan kanchik, siminchikmi miski rimaq kanchik, allin chakra ruruchiq, tukuy ruwaykunamanmi churapakunchik llaqtanchikrayku; chayrayku rimarispa, tantiyaykanakuspa llamkasunchik hanaq pacha, kay pacha, uku pacha allin kawsaypi kananpaq, tayta inti, mama killa, mamapacha kusirikunankupaq; nispaqa tukuy sunqunchikmantan llanllariy lluqsimunqa llaqtanchikrayku, ayllunchikrayku, chaymantaqa lliw runan qatipakunqa kusi kusilla kanankupaq.
Chaymantataq huklaw llaqtakunamanta chayamunqaku runakuna, riqsiq, taripaq llaqtanchikta, chayna kaptinqa, allin simiwan riqsichisunchik kawsayninchikta; chaykama warmakunapas, waynakunapas churapakunqa, hinallataq, mikunakunata, pachanchikkunata rantipakuypaq churasun chayta ruwaspaqa, qullqinchikpas wiñanqa sapa ayllupi; hinaspa llaqtanchik, allin qawasqa kanqa lliw tiqsi muyupi., kawsachun Antawaylla kay raymichakuypi.
