Wakcha Warmachamanta

0
927

Taksa llaqtapis tiyasqa mama Primitiva wakcha willkachanwan ñisu wakchas kasqaku mikunankupaqpas runakunamanta mañakusqaku. Chaysi huk punchaw warmacha wasin punkupi rumichakunawan pukllakuchkaptin llapa allqu huk taytakuchata qaryamusqa, raskallana ayqikuchkaspas taytakuchaqa tikrarpakun hinaptinsi allqukuna pampapi warachankunamanta chutapyaykun. Chayta qawaspansi warmachaqa pawasqa amachakuq chay pukllasqan rumikunawan allquta panastin, chayllaman mama Primitiva qispiramuspa taytakuchataqa amacharunku alluqukunamanta, hinaspa wasinman apaykuruspa sumaqta uyankunata mayllirunku hinallataq lliki pachankunatapas sirarapunku, hinaspa urullana papata sumaqninta akllaruspanku waykurunku chayta miskipayuqta mikurachinku saksanankama.
Mikuyta tukuruptinñataq mama Primitivaqa tapun ¿maymantataq qamri kanki taytay? Taytakuchaqa anchata waqakuspas willayta hallaykun; ñuqaqa kani karu llaqtamanta, anchata añanchaykichik kay miski mikuna quykuwasqaykichikmanta manaña qankunapaqpas kachkaptin mikurachiwankichik. ñisuta yarqaruwaptinmi kay llaqtata hamurqani chaymi sapa wasiman yaykuptiy mana ima yakullatapas pipas qaywaykuwanchu hinallataq qawasqaykichikhina allqunkunan qaryaykamuwan, yapamanta añanchaykichik sumaq sunquyuqkuna huk punchawmi kanqa qamkunapaqpas.
Chaynata rimaruspas taytakuchaqa ripukusqa tukuy kinrayta, urqu chinkariyta;
chay tutas wakcha warmachaqa taytakuchamanta yuyaymanaspa ancha llakisqa puñurukusqa; hinaptinsi allin chawpi tutata musquyninpi tukuy kinray ñanta llapa angelkuna kuyakuyninta apamusqaku wasinman; kawsay, pachata, uywakunata chaysi warmachaqa kusikuymanta manaña imatapas ruwayta atisqachu hinaspa richkarpasqa, chaypis tukuy ima wasinpi kaykuchkasqa ancha kusisqa maman Primitivaman pawaspas anchata waqarukusqaku kusikuymanta.
Llaqtanchikpiqa, lliw runakunatan yanapana, aswan kay sasachakuykunapipas, chayna kaptinqa taytachapas, hinallataq tayta urqukunapas, pachamamapas kusirikun, chaypi waqaychapuwanchik allin kawsaypi qipapi kananchikpaq.

Escribe: Carlos Arévalo

¿Qué opinas?

DEJA UNA RESPUESTA

Por favor ingrese su comentario!
Por favor ingrese su nombre aquí